Habakkuk 1

1Isiqalekiso esemukelwa nguHabakhukhi umphrofethi.

Insolo KaHabakhukhi

 2Koze kube nini, awu Jehova, ngicela usizo, kodwa ungalaleli na? Loba ngimemezela kuwe ngisithi, “Udlakela!” kodwa ungangihlengi na?

3Kungani ungitshengisa okungasimfanelo na? Kungani ubekezelela okungalunganga na? Ukuchitheka lodlakela kuphambi kwami; kulokulwa, lengxabano yandile.

4Ngakho umthetho usuthundubezekile, lokulunga akusabi khona. Ababi baminyezela abalungileyo ukuze ukulunga konakaliswe.

Impendulo KaJehova

 5“Khangelani ezizweni libone njalo limangale kakhulu. Ngoba ezinsukwini zenu ngizakwenza into elingeke liyikholwe, lanxa lingabe litsheliwe.

6Sengivusa amaKhaledi, lesiya isizwe esilesihluku lamawala, esitshangaza umhlaba wonke ukuyathumba izindawo zokuhlala ezingasizo zaso.

7Bayisizwe esesabekayo lesitshayisa uvalo; bangumthetho bona ngokwabo njalo baziphakamisa udumo lwabo.

8Amabhiza abo alesiqubu esedlula esezingwe, ayesabeka kulezimpisi kusihlwa. Amabhiza abo empi amatha ephulukundlela, abagadi bawo amabhiza bavela khatshana. Bandiza njengamanqe ehwitha ukudla,

9bonke beza belande udlakela. Amaxuku abo aqhubekela phambili njengomoya wasenkangala abuthe abathunjiweyo njengenhlabathi.

10Baklolodela amakhosi, bahleke ababusi usulu. Wonke amadolobho avikelweyo bayawahleka; bakha amadundulu ngenhlabathi bawathumbe lawo madolobho.

11Emva kwalokho badlula ngesiqubu njengomoya baqhubeke – abantu abalecala abamandla abo angunkulunkulu wabo.”

Insolo Yesibili KaHabakhukhi

 12Awu Jehova, kawuveli phakade na? Nkulunkulu wami, Ngcwele wami, kasiyikufa. Awu Jehova, ubabekile ukuba bahlulele. Awu Dwala, ubamisile ukuba bajezise.

13Amehlo akho ahlanzeke kakhulu ukuba akhangele okubi; awungeke ubekezelele okungalunganga. Pho kungani ubekezelela abachithayo na? Uthulelani lapho ababi beqeda labo abalunge kakhulu kulabo na?

14Wenze abantu bafana lenhlanzi olwandle, njengezidalwa zasolwandle ezingelambusi.

15Isitha esibi siyazikhupha zonke ngewuka, siyazibamba ngembule laso, sizibuthele embuleni laso elidonswayo; ngalokho siyajabula sithokoze.

16Ngakho-ke senzela imbule laso umhlatshelo, sitshisele imbule laso elidonswayo impepha ngoba ngenxa yembule laso sithe pekle phakathi kwenotho, sizitika ngokudla okumnandi.

17Kuzamele siqhubeke sithulula umbule waso, sitshabalalisa izizwe kungekho sihawu na?
Copyright information for NdeIBE